【試當真NTR熱】咩係NFT? 同Bitcoin有咩分別? -

2021年NFT 引起咗一波熱潮，藝術家 Beeple（本名Mike Winkelmann）10 秒短片《Crossroads》嘅NFT喺舊年年頭以 660 萬美元成交。之後，Twitter 創辦人Jack Dorsey 嘅第一篇推文「just setting up my twttr」亦都以290 萬美元賣出。NFT 究竟只不過係巨大嘅投資泡沫抑或真係物有所值？

首先我哋要知道咩係NFT先。NFT 又稱 Non-Fungible Token (不可替代的代幣) , NFT 如同中文譯名，每一粒NFT 都係獨特嘅。NFT同比特幣、以太幣等虛擬貨幣一樣依靠區塊鏈進行交易。每一粒Bitcoin 嘅價值都係一樣（截至26日晚九點半：HKD$315,573.91 ），但NFT嘅價值就係由NFT創造者所定。所以其實我哋可以視NFT為藝術品，如果有人欣賞嗰個NFT 咁自然會有買賣。

如果我哋想把握呢個趨勢加入NFT，有咩風險要留意? NFT 究竟對創作者有啲咩影響？

投資或創造NFT

如果我哋要投資或創造NFT, 首先我哋要了解NFT嘅交易平台。全球最大嘅NFT 交易平台係Opensea，佢是一個綜合型NFT交易所，同其它交易所唔同嘅係，Opensea擁有豐富嘅NFT種類，無論係遊戲、影音、定係網域名稱，都可以喺Opensea上面搵到。咁我哋可以點樣喺 Opensea 製造NFT 呢？其實好簡單，打開Opensea 之後我哋點擊create ，如果你已經擁有軟件加密貨幣錢包，咁你就可以係Opensea 加入你個錢包；如果冇就要自己整返個（比較出名嘅軟件加密貨幣錢包有MetaMask）。

當你成功加入咗個錢包喺opensea 之後，你就可以將自己創作嘅圖、音樂、影片等轉成NFT。如果你嘅NFT 有特別嘅元素，你可以加插TAG ，令其他人搜尋NFT 時更容易發掘到你嘅NFT。

雖然mint NFT唔洗畀錢，不過如果你想有人買你嘅NFT 就要先用軟件加密貨幣錢包畀Gasfee （油費）先可以推 NFT出 market 㗎！Gasfee 主要係用以太幣付款，而以太幣嘅定價係浮動嘅。所以，如果你考慮整NFT ，要清楚明白當中嘅風險。

NFT點幫到創作者？

話雖如此，NFT 長遠嚟講有可能為創作者帶來被動收入。因為當第一個買家賣出創作者嘅NFT 畀其他人時，創作者都可以獲得一定百分比嘅分潤。而如果粉絲買入創作者嘅NFT ，當中嘅錢會100% 去返創作者度，創作者就可以透過NFT 直接得到粉絲嘅經濟支持。

NTR：試當真的NFT

NFT 為創作者帶嚟更好嘅機遇同自由度。以「試當真」為例子，雖然佢哋一早已經有YouTube 會員制嘅方法去獲得觀眾嘅經濟支持，不過當中嘅會員費有部分會被YouTube 收取作平台費用。因此，佢哋決定進入NFT 嘅世界，希望更直接獲得觀眾支持。試當真嘅NFT Project 名為NTR（Next Trial Run），持有NTR 嘅人會有四大福利，當中包括到戲院觀賞每月精選影片「謝票場」同演員交流、可以優先購得舞台劇VIP 門票、可參與「藝員訓練班」選秀工作、以及可以喺電影留下名字同埋出席獨家首映禮。

NTR今日（26日）中午已經截止認購，一共售出2,692個，以每張0.2以太幣售價計算，估計NTR已經為試當真籌得超過一千二百萬。可見NFT 係一個難得嘅機遇為，創作者帶來最直接嘅支持。