【離_留_香港（二）】大專生自組社區義補興趣班 -

「有啲人可能有資源離開呢個咁壓逼嘅地方，但係社會上總有班人冇能力離開，咁（到時）有冇人幫佢哋呢？」

疫情下好多在職家長都需要 Work form home。但「暑假」突然提早殺到，喺應付工作嘅同時仲要照顧住冇得落街放電嘅仔女，真係有苦自己知…… 呢個矛盾喺基層家庭入而更加大，可能佢哋冇得在家工作，甚或是需要放無薪假，經濟開支同個人情緒都承受住巨大壓力。

Cakey、Leo 同阿 Yi 幾位大專生一年前睇到社區有呢個需要，決定喺自己教會搵咗一班有相同理念嘅朋友，組成咗翊‧光 Guide x Light 。希望為社區入面有需要嘅家庭提供到支援，減輕家長壓力；同時希望小朋友無論家境、「起跑線」係點樣，都有參加到自己鍾意嘅興趣班嘅權利。

當所有家長都投放最好資源喺小朋友身上，為求佢哋可以「贏在起跑線」，咁缺乏資源嘅小朋友係咪又注定「輸在起跑線」？

「我哋眼中從來冇贏在起跑線，每個小朋友都有自己獨特嘅才能，翊光只係一個空間，提供機會畀每一個小朋友發掘自己嘅潛能。」

翊光嘅一班大專生，看見社區上不同需要，就決定自組社區義補興趣班。由起初嘅義補、籃球班，再去到畫畫班、Phonics班、跳舞班……嘗試透過自己小小力量，幫助社區上有需要嘅家庭。